Airbnb ги промени своите правила за да го ограничи она што домаќините можат да го бараат од гостите, вклучително и обврските за чистење.
Ажурираните упатства предвидуваат дека домаќините сега можат да постават седум стандардни куќни правила, како и да додаваат други „разумни“ барања, пишува Би-Би-Си.
Airbnb наведува дека од гостите од кои се бара да платат такса за чистење – не треба да се бара да извршуваат задачи што вообичаено ги извршува персоналот за чистење, вклучително и миење садови и вадење постелнина.
Новите правила ќе важат за сите резервации направени на или по 20 ноември преку оваа платформа за изнајмување сместувачки капацитети.
„Куќните правила им помагаат на гостите да разберат што очекуваат домаќините од нив, но слушнавме од нашата заедница дека овие правила може да бидат збунувачки, напорни и тешки за спроведување“, велат од компанијата за Би-Би-Си.
„Затоа ги преобликувавме за полесно да се најдат и појасно да се дефинираат, со нова политика која гарантира дека барањата се разумни и дека нема непријатни изненадувања“, додаваат од компанијата.
Според новите услови објавени на веб-страницата на Airbnb, домаќините генерално не смеат да бараат од гостите да извршуваат задачи што „бараат значителен напор или време или што инаку би ги извршувал персоналот за чистење, вклучително и отстранување на постелнина, изнесување ѓубре или миење и средување садови“.
Компанијата соопшти дека може да одобри исклучоци во одредени околности. На пример, од гостите може да се побара да го ограничат времето на туширање ако се во сила локални ограничувања за вода поради суша.
Правилата што важат за одреден оглас сега ќе бидат повидливо прикажани на гостите и ќе се појавуваат во потсетници поврзани со нивните резервации.
Посебни договори ќе бидат дозволени само во ограничени околности, вклучително и кога тоа го бара закон или здружение на сопственици на домови.
Иако домаќините нема да можат да издаваат казни, тие сепак ќе имаат контрола врз правилата на куќата и барањата што ги поставуваат, соопшти компанијата.
Доколку барањето на домаќинот не е во согласност со правилата на Airbnb, тоа ќе биде посочено, а сопственикот ќе може да поднесе жалба ако не се согласува со таквата проценка.
Изгубено далечинско: Кеси и Џон предизвикаа реакции
Гостите со години се жалат на неразумни обврски што морале да ги исполнат пред да го напуштат сместувањето, особено имајќи предвид дека мора да платат и надомест за чистење.
Видеата на ТикТок на кои домаќинките на Airbnb, Кеси и Џон, педантно го проверуваат својот имот за изнајмување во Џорџија откако гостите ќе си заминат, неодамна станаа вирални поради нивната педантност.
На пример, во едно видео, двојката ги обвинува гостите дека „не ги почитуваат правилата на куќата“ поради тоа што го изгубиле далечинскиот управувач на телевизорот.
Кеси и Џон се соочија со критики за нивните строги правила и високи стандарди, но одговорија велејќи дека нивната содржина е погрешно протолкувана.
Нивните видеа ги инспирираа другите креатори на содржини да пародираат премногу строги домаќини.
