Предлог-резолуцијата на ДОМ за регулиран развој на дата-центрите и заштита на енергијата, водните ресурси и локалните заедници е прифатена со поддршка од сестринските зелени партии во Европската зелена партија. Документот ќе биде ставен на гласање на претстојниот конгрес на партијата во Варшава.
Од ДОМ велат дека иницијативата има цел да воспостави јасни и обврзувачки европски правила за изградба и функционирање на дата-центрите, со мерливи критериуми за потрошувачката на електрична енергија и вода, влијанието врз електроенергетската мрежа и вклучувањето на локалните заедници.
„Време е за европски и јасни правила“, наведуваат од партијата, посочувајќи дека Македонија е конкретен пример за потребата од ваква регулатива.
Според ДОМ, со законските измени усвоени годинава се олеснува развојот на дата-центрите и придружната енергетска инфраструктура, вклучително и преку поедноставување на урбанистичкото планирање. Партијата забележува дека условите и критериумите за најавениот Национален дата-центар, како и разговорите со шест компании за неговото финансирање, не се доволно транспарентни за јавноста.
Од ДОМ предупредуваат дека покрај државниот проект, се отвора простор и за комерцијални дата-центри, при што како пример го посочуваат случајот во Пехчево. Тие бараат стручната јавност и локалните заедници да бидат вклучени во одлучувањето.
Иницијативата доаѓа во период на забрзан развој на дата-центрите во Европа, поттикнат и од зголемената употреба на вештачката интелигенција. Според процените наведени во соопштението, до 2030 година нивната потрошувачка на електрична енергија во ЕУ би можела да достигне 114 терават-часови, или околу 3,2 проценти од вкупната потрошувачка.
ДОМ бара европската рамка да важи и за земјите кандидати за членство во ЕУ, вклучително и Македонија, со цел развојот на дигиталната инфраструктура да се усогласи со енергетската и водната сигурност и јавниот интерес.
