Две месарници во Охрид и Струга се соочуваат со прекршочни санкции откако не ја почитувале забраната за увоз и употреба на пилешки желудник, соопшти Агенцијата за храна и ветеринарство (АХВ).
При вонредните инспекциски контроли во двата града биле запленети и уништени илјада килограми пилешки желудник. Инспекторите пронашле и 55 килограми подготовки од месо во кои била употребена оваа забранета состојка.
Од АХВ велат дека акцијата е дел од засилените контроли насочени кон спречување на нелегалните активности со овој вид храна, сузбивање на ваквиот криминал и заштита на здравјето на потрошувачите.
„Со цел обезбедување на висок степен на заштита на јавното здравје и интересите на потрошувачите, Агенцијата во јули 2024 година донесе решение за забрана за увоз и употреба на пилешки желудник наменети за човечка исхрана, во производство на подготовки и производи од поради утврдени потенцијали ризици од употребата на мускулниот дел од желудникот на живината по здравјето на луѓето – можна контаминација со патогени – бактерии и вируси, присуство на токсини и сл. Решението за забрана АХВ ја донесе врз основа на резултатите од спроведената анализа на ризик од можни опасности по здравјето на граѓаните од консумација на овој тип внатрешни органи од живина по здравјето на граѓаните и од резултатите од спроведените инспекциски контроли со кои тогаш беше утврдена злоупотреба и измама на потрошувачите од страна на неколку месни индустрии“, соопшти АХВ.
Забраната за увоз и употреба на пилешки желудник за човечка исхрана е донесена во јули 2024 година, по извршена анализа на ризик и инспекциски контроли во кои биле утврдени злоупотреби и измама на потрошувачите од неколку месни индустрии.
