Кога Бен Стилер му понуди на Енди Родик улога во филм што го продуцираше за тенисер кој почнува да игра пикбол, поранешниот светски број еден го одбиваќе наградуваниот актер и продуцент. И тоа постојано.
„Гостувачките настапи на спортисти во филмовите се обично ужасни“, вели Родик. „Веројатно му реков не четири или пет пати.“, раскажува за медиумите поранешниот славен тенисер.
Но, улогата не беше само камео, објасни Стилер. Филмот всушност не можеше да се направи без Родик, кој требаше да го игра тенискиот ривал од детството на главниот лик, со кого на крајот се соочува во одлучувачки натпревар по пикбол.
Чувството на вина се појави и Родик конечно се согласи да глуми заедно со Џејк Џонсон во „Динк“, филм кој премиерно се прикажа на Apple TV ова лето.
Филмот е само еден дел од јавното оживување на 43-годишниот член на Тениската сала на славните по повеќе од една деценија мала јавна експонираност.
Родик за прв пат се појави во коментаторската кабина и на аналитичката маса на ESPN за време на Вимблдон во јули. Сега се врати за Отвореното првенство на САД. Цело време, тој ја водеше својата емисија, „Served“. Се емитува двапати неделно и прерасна во веројатно најпопуларниот тениски подкаст во светот.
Форбс проценува дека емисијата генерирала околу 4 милиони долари приходи од реклами минатата година – од кои голем дел оди директно кај Родик. Исто така, има речиси 1 милион долари проценети заработки од неговата работа на телевизија и филм.
„Секогаш бев зафатен со нешто во текот на тие 10 години додека бев надвор од играта, па не знам дали тоа беше свесна работа“, раскажува Родик за Форбс за неговото враќање во центарот на вниманието. „Мислам дека беше повеќе како снежна топка што се тркалаше и стануваше поголема. И едноставно уживав во сè што правев по патот.“
Неочекуван прекин во кариерата
Со оглед на тоа колку добро стана познат надвор од спортскиот свет во 2000-тите – со врски со познати личности, водење на Saturday Night Live и реклами „Got Milk?“ – втората кариера во тениските медиуми би изгледала како природен избор откако Родик ненадејно го објави своето пензионирање во 2013 година, на неговиот 30-ти роденден.
Но, во тоа време, подкастите сè уште не беа одржлива медиумска категорија. Родик цврсто одбиваше да ја покрива АТП турнејата како телевизиска личност, бидејќи веќе беше уморен од глобалниот распоред за патувања.
Во исто време, тој се бореше да се справи со тежината на прекарите како „некогашно чудо од Гренд слем“ и „последниот Американец што освои Гренд слем“. Тие останаа со него по неговиот триумф на Отвореното првенство на САД во 2003 година и четири последователни порази во финалето на Гренд слем од Роџер Федерер.
„Телевизијата не е нешто што некогаш сум помислил дека ќе го правам“, вели Родик. Тој освои 32 АТП титули и заврши меѓу првите 10 на АТП ранг-листата девет последователни години. Тој заработи повеќе од 20 милиони долари од турнирски приходи во текот на својата кариера.
„Ми беше тешко да ја направам таа ментална гимнастика и да се убедам себеси да седнам во коментаторската кабина кога знаев дека веројатно сè уште можам да бидам таму и да играм.
,,Потсетете ги луѓето дека сте живи”
Наместо тоа, Родик се повлече од јавноста. Инвестираше во комерцијални недвижности, водеше фондација и се посвети на своите мали деца. Го пресели своето семејство во Шарлот, Северна Каролина, за да биде поблиску до семејството на неговата сопруга.
Кога списанието GQ му пристапи за да ја прослави 20-годишнината од неговата титула на Гренд слем, неговата сопруга – моделот и актерка Бруклин Декер – беше таа што мораше да го убеди да се согласи.
„Кој е твојот проблем?“, се сеќава тој дека му рекла. „Во ред е да ги потсетиш луѓето дека си жив.“
Исчезнувањето на Родик од јавноста беше толку убедливо што кога се спријатели со Мајк Хајден додека ги чекаа своите деца пред градинката, сопругата на Хајден немаше поим кој е тој.
„Таа беше како, „Енди кој?“, се сеќава Хајден.
Но, Хајден виде потенцијал и понуди да ги комбинира своите долгогодишни искуства во спортската телевизија со тениското знаење на Родик за да создаде видео подкаст.
Неколку чаши вино и бизнисот веднаш е во подем
Една вечер, по неколку чаши вино, тие нарачаа опрема во вредност од 5.000 долари од Амазон и решија да ја пробаат.
Лансирана во јануари 2024 година, емисијата на Родик пополни празнина во екосистемот на тениските медиуми, каде што поголемиот дел од анализите традиционално беа резервирани за сегменти од 30 секунди на телевизија во живо. Повеќето играчи се достапни за новинарите само неколку минути за време на прес-конференциите.
Статусот на Родик како поранешен светски број еден, во комбинација со новинарските квалификации на ко-водителот Џон Вертхајм од „Спортс илустрејтид“ и „60 минути“, ѝ овозможи на емисијата да ги промени правилата на двата фронта.
Бизнисот доби ран поттик кога „Тенис ченел“ ги купи кабелските права за емисијата. Наскоро порасна до тој степен што Родик и Хајден повеќе не можеа сами да ја водат.
„Не знам ништо за продажбата“, вели Хајден. „Морав да побарам на Гугл што значи „DAI“ [динамично вметнување реклами] кога луѓето почнаа да зборуваат за тоа на состаноците.“
Кон крајот на 2024 година, емисијата потпиша договор со Vox Media Podcasts за продажба и дистрибуција на реклами. Кога тениската легенда Рафаел Надал се појави во епизода во март 2025 година, во неговото прво проширено интервју по пензионирањето, емисијата „експлодираше“, вели Родик.
Според Форбс, Served ги зголеми своите приходи од рекламирање од помалку од 1 милион долари во првата година на повеќе од 2 милиони долари во втората.
Како и повеќето успешни подкастери, Родик го задржа сопствеништвото на емисијата – Хајден и Вертхајм исто така имаат удели. Тој ја лиценцираше на Vox во замена за загарантиран минимален однапред надомест и дел од приходите од рекламирање.
