Владејачката партија „Единствена Русија“ убедливо победи на парламентарните избори, први за мандати во Државната дума од почетокот на инвазијата врз Украина во 2022 година.
Според првичните официјални резултати, по пребројувањето на најголемиот дел од гласовите, „Единствена Русија“ освоила околу 57,5 отсто од гласовите. На второ место е Комунистичката партија со околу 13,8 отсто, а потоа следуваат ЛДПР со околу 8,9 и „Нови луѓе“ со околу 7,9 отсто.
На изборите се избираа сите 450 пратеници во Државната дума. Според досегашниот тек на пребројувањето, „Единствена Русија“ има водство и во голем број едномандатни изборни единици, па останува да се утврди конечниот состав на новиот парламент и дали партијата ќе го задржи двотретинското, односно уставно мнозинство.
Изборите се одржаа во услови на продолжување на војната во Украина. Претседателот Владимир Путин претходно го претставуваше гласањето како показател за поддршката за руската политика и воените напори.
Во исто време, изборниот процес беше проследен со критики од опозициски групи и меѓународни набљудувачи поради ограничениот политички простор. Партијата „Јаблоко“, која отворено се спротивставува на војната, не учествуваше на изборите, додека други партии и кандидати кои се противат на војната исто така не добија можност да настапат.
Гласањето се одржа и на украински територии кои Русија ги окупира и ги прогласи за дел од својата територија. Украина го отфрли гласањето во овие области како нелегитимно и повика резултатите од нив да не бидат признаени.
