Во Русија денеска почна тридневното гласање за нов состав на Државната дума, во првите парламентарни избори откако Москва ја започна целосната инвазија врз Украина во февруари 2022 година. Гласањето ќе трае до 20 септември, а граѓаните избираат 450 пратеници со петгодишен мандат.
Половина од пратениците се избираат преку партиски листи, додека останатите 225 мандати се освојуваат во едномандатни изборни единици. Изборите започнаа на рускиот Далечен Исток и постепено се отвораат избирачките места низ 11 временски зони.
На изборите доминира партијата „Единствена Русија“ на претседателот Владимир Путин, која во досегашниот состав на Думата има 310 од вкупно 450 места. Според последните предизборни мерења на државниот центар ВЦИОМ, „Единствена Русија“ имала поддршка од 37 проценти, пред Комунистичката партија со 11,6 проценти. Станува збор за предизборни анкети.
Путин ги повика граѓаните да излезат на избори, при што гласањето го поврза со актуелната војна во Украина. Тој порача дека учеството на изборите треба да покаже единство и поддршка за руските војници и државната политика во услови на војна и меѓународен притисок.
Изборите се одржуваат во услови на ограничен политички простор за противниците на Кремљ. Либералната партија „Јаблоко“, која отворено се противи на војната, е исклучена од националното гласање за партиски листи, иако дел од нејзините кандидати учествуваат индивидуално во едномандатни изборни единици. Останатите поголеми парламентарни партии во различен степен ја поддржуваат владината политика и воените напори.
Гласање се одржува и на територии во Украина што се под руска контрола и кои Москва ги прогласи за дел од Руската Федерација.
Покрај парламентарните избори, во Русија истовремено се одржуваат повеќе од 2.200 изборни процеси на регионално и локално ниво, меѓу кои избори за гувернери и регионални парламенти. Во некои региони гласањето се одвива под посебни безбедносни услови поради војната.
Изборите се одржуваат и во услови на економски притисок, високи каматни стапки, недостиг на работна сила и зголемени државни издвојувања за одбраната. Гласањето завршува во недела, а првите резултати се очекуваат по затворањето на последните избирачки места.
