Вишиот суд во Белград му одреди притвор до 30 дена на Давор Мацура, сопственикот на Алта банка, кој е осомничен дека од трезорот на банката незаконски изнел околу 45 милијарди динари, односно приближно 383 милиони евра. Притвор им е одреден и на уште двајца вработени во банката, кои се сомничат дека му помогнале во извршувањето на делото.
Станува збор за директорот на Одделението за трезор и управување со готовина, Г.М., и соработникот за трезорско работење, И.П.
Според одлуката на судот, тројцата ќе останат во притвор поради опасност од влијание врз сведоци и можност за повторување на кривичното дело во краток временски период. За Мацура дополнително е определен притвор и поради опасност од бегство.
Според наводите на Обвинителството за организиран криминал, Мацура се сомничи дека во подолг период, заклучно со 31 октомври годинава, ја злоупотребил својата позиција и ги пречекорил овластувањата, изнесувајќи пари од трезорот на банката.
Истрагата покажува дека двајцата вработени, кои биле задолжени за непосредно ракување со вредностите во трезорот, наводно му овозможувале неовластен пристап. Тие му предавале картички за влез или со сопствените картички и присуство му овозможувале пристап до трезорот познат како „Депо“.
На тој начин, според сомнежите на истражните органи, Мацура изнесувал пари и стекнал противправна имотна корист од околу 45 милијарди динари. На двајцата соработници им се става на товар помагање во злоупотреба на положбата на одговорното лице.
Мацура беше уапсен на 2 ноември, по претресите што претходно биле извршени во просториите на банката и во неговиот стан. При акцијата бил направен и попис на готовината во трезорот.
На сослушувањето пред Обвинителството, Мацура ги отфрлил обвинувањата и негирал вина. Неговиот адвокат Иса Спаховиќ изјави дека неговиот клиент ги отфрла сите наводи од кривичната пријава.
„Во кривичната пријава се наведува дека Мацура користел картички, влегувал во трезорот и изнесувал пари, но не постои ниту еден доказ дека тој некогаш бил во тој трезор или поседувал такви картички“, изјави Спаховиќ.
Одбраната најави дека ќе ги оспорува наводите на обвинителството, а против решението за притвор е дозволена жалба во рок од три дена.
Случајот добива дополнителна тежина по одлуката на Народната банка на Србија од 31 октомври да ѝ ја одземе дозволата за работа на Алта банка. На 3 ноември беше отворена стечајна постапка, а за стечаен управник е назначена Агенцијата за осигурување на депозити.
