Израелскиот премиер Бенјамин Нетанјаху го одржа своето обраќање пред Генералното собрание на Обединетите нации во Њујорк, додека десетици делегати од различни земји ја напуштија салата во знак на протест поради израелските воени операции во Газа и на палестинските територии.
„Не можете да ме замолчите и не можете да ја замолчите вистината“, порача Нетанјаху, обраќајќи им се на присутните по масовното напуштање на салата. Тој ги нарече делегатите што си заминаа „морални кукавици“ и повика и останатите кои не се согласуваат со него да ја напуштат просторијата.
„Израел не изврши геноцид. Израел спречи геноцид“, порача тој, бранејќи ги постапките на израелската влада.
Нетанјаху го пофали и американскиот претседател Доналд Трамп, нарекувајќи ги САД најголемиот партнер на Израел во конфликтите на повеќе фронтови, меѓу кои и војната со Иран.
Обраќањето се одржа во услови на засилена меѓународна критика за израелските операции во Газа и насилството на Западниот Брег. Во близина на седиштето на ОН се одржаа и протести со барања за прекин на воената поддршка за Израел и заштита на палестинските цивили.
Нетанјаху ги отфрли критиките од повеќе западни земји, обвинувајќи ги нивните лидери дека попуштаат пред притисоците. Тој истакна дека Израел ќе продолжи да се брани и да ги штити своите граѓани.
Обраќањето беше проследено со празни места во салата, додека израелскиот премиер продолжи да зборува пред преостанатите делегати.
