Едно лице е уапсено во рамките на истрагата на полските власти за можен обид за напад врз полскиот премиер Доналд Туск и министерот за одбрана Владислав Косињак-Камиш.
Портпаролката на Министерството за внатрешни работи, Каролина Галецка, напиша на социјалните мрежи дека полскиот министер за внатрешни работи, Марчин Кервијнски, и координаторот за специјални служби, Томаш Сиемонјак, наредиле мерките да се преземат по „можен обид за атентат врз премиерот… како и врз заменик-премиерот и министерот за национална одбрана“, според „Политико“.
Туск подоцна потврди на социјалните мрежи дека е уапсен маж во врска со наводниот заговор.
Претставници на полицијата, Службата за заштита на државните службеници и Агенцијата за внатрешна безбедност одржаа итен состанок во неделата во центарот за борба против тероризмот на Агенцијата за внатрешна безбедност за да разговараат за ситуацијата.
По состанокот, Јацек Добжински, портпарол на Семоњак, им изјави на новинарите дека властите „го сфаќаат овој случај многу сериозно“.
„Месец по месец, година по година, полицијата добива сè повеќе закани и загрижувачки пораки. Во овој случај, зборуваме за голема веројатност дека овие закани можеле да бидат извршени“, рече тој.
Не се објавени дополнителни детали за наводниот заговор и останува нејасно кој би можел да стои зад него.
Политико напиша во својот напис дека „Полска е на првата линија на хибридната војна на Русија против европските поддржувачи на Украина и е цел на сајбер напади што ѝ се припишуваат на Москва“.
Полска во последните недели доживеа бран насилни инциденти во училиштата, вклучително и смртта на училишен домар во напад со нож.
