Партиите од левиот центар ги освоија парламентарните избори во Шведска со минимална предност пред десничарскиот блок, по преброени 99 отсто од гласовите.
Опозицискиот блок, предводен од Социјалдемократите на Магдалена Андерсон, според досегашните резултати има 175 пратенички места во 349-члениот парламент, додека десничарскиот блок околу актуелниот премиер Улф Кристерсон има 174 мандати.
Разликата меѓу двата блока е исклучително мала – околу 26 илјади гласови. Иако остануваат да се пребројат уште дел од гласовите, вклучително и пристигнатите по пошта и гласовите од странство, шведскиот јавен сервис проценува дека шансите за промена на резултатот се многу мали.
Социјалдемократите остануваат најголемата поединечна партија во парламентот, а изборниот резултат сега ѝ отвора можност на Магдалена Андерсон да застане на чело на владата.
Сепак, победата на левиот центар не значи автоматски и лесно формирање влада. За обезбедување стабилно парламентарно мнозинство ќе бидат потребни преговори меѓу партиите од опозицискиот блок, кои имаат различни ставови за идното функционирање на владата.
Десничарскиот блок, предводен од Кристерсон, во досегашниот мандат владееше со поддршка од Шведските демократи. По изборите, токму распределбата на мандатите и односите меѓу партиите ќе бидат клучни за тоа кој ќе успее да формира влада.
Кристерсон веќе најави дека ќе ги разгледа можностите за продолжување на политичката соработка, но конечниот исход ќе зависи од завршувањето на пребројувањето и од последователните преговори.
Шведска сега влегува во период на преговори за формирање нова влада, по избори кои завршија со една од најтесните разлики меѓу двата политички блока во поновата историја на земјата.
