Црногорската влада го промени името на градскиот базен во Котор, кој во изминатите пет години го носеше името на ватерполистот Зоран Џими Гопчевиќ, и ретроактивно ја одобри спомен-плочата за хрватските затвореници во поранешниот логор Морињ. Со овие одлуки, Подгорица исполнува два од осумте услови што Хрватска ги постави во контекст на поддршката за црногорскиот пат кон членство во Европската Унија, пренесува Н1.
Спортскиот објект во иднина ќе го носи името „Градски базен – Петар II Петровиќ Његош“. Втората одлука се однесува на спомен-плочата во Морињ, за која ретроактивно се одобрени текстот, изгледот, димензиите и локацијата. Плочата беше поставена во октомври 2022 година.
Пленковиќ влијаеше врз заклучоците на ЕУ за Црна Гора, роковите за преговорите се отстранети
Хрватска претходно достави до земјите-членки на ЕУ и до лидерите на европските институции список со осум нерешени прашања за кои очекува конкретен напредок од Црна Гора пред завршувањето на пристапните преговори. Загреб ја поддржува европската интеграција на соседната земја, но инсистира на решавање на отворените прашања.
Покрај преименувањето на базенот и статусот на спомен-плочата, хрватските барања опфаќаат обештетување на хрватските државјани притворени во логорот Морињ, информации за 14 исчезнати хрватски државјани и процесирање на воени злосторства, вклучително и утврдување командна одговорност.
На списокот се и решавање на имотните барања на хрватските семејства во Црна Гора, враќање на бродот за обука „Јадран“ и решавање на граничниот спор меѓу двете земји.
Одлуките на црногорската влада претставуваат чекор во решавањето на дел од отворените прашања меѓу Подгорица и Загреб, во период кога Црна Гора продолжува со преговорите за членство во Европската Унија.
