Охрид добива модернизиран воздушен влез во земјата, но и нов начин на кој ќе им посака добредојде на странските посетители. Аеродромот „Св. Апостол Павле“ е реконструиран со инвестиција од 2,7 милиони евра, а обновениот терминал воедно е збогатен со елементи што го претставуваат богатото културно наследство на Охрид.
Во делови од аеродромот поставени се реплики на познати мозаици од археолошкиот локалитет Плаошник, како и мотиви инспирирани од фреските во црквата „Света Софија“. Со тоа, просторот не е замислен само како функционален терминал, туку и како своевидна прва културна разгледница за туристите кои пристигнуваат во Охрид.
Реконструкцијата опфати значителни промени во патничкиот терминал. Проширен е просторот за чекирање, зголемен е бројот на шалтери, а унапредени се зоните за безбедносна контрола и рачен багаж. Реорганизиран е и паркингот, додека воведената современа опрема треба да овозможи побрзо, поефикасно и побезбедно опслужување на патниците.
Обновувањето се реализираше во период на зголемен воздушен сообраќај, со цел аеродромот да може да одговори на растечкиот број патници и авиокомпании. Само во првата половина од годинава, низ охридскиот аеродром поминале повеќе од 240 илјади патници.
Рекордите продолжија и во летниот период. Во еден ден биле регистрирани над 3.000 патници, додека во одредени денови бројот на полетувања надминувал 20.
Очекувањата се дека со зголемувањето на капацитетите и подобрувањето на условите за патниците, Охрид ќе може да пречека уште поголем број гости од странство. За туристичкиот центар, тоа значи не само поголема достапност, туку и можност уште на самиот влез посетителите да се запознаат со културното богатство на градот.
Модернизацијата на аеродромот доаѓа во година во која Македонија одбележува 35 години независност, а Охрид продолжува да се позиционира како една од клучните туристички дестинации во земјата.
Со новиот изглед, „Св. Апостол Павле“ треба да има двојна улога – современ транспортен центар способен да го следи растот на патничкиот сообраќај и место каде што културното наследство на Охрид ќе биде претставено уште при првиот контакт на странските туристи со градот.
