Поранешниот командант на Војската на Република Српска, Ратко Младиќ, денеска ќе биде погребан на Топчидерските гробишта во Белград. Опелото ќе се одржи во црквата „Свети Лука“, а на церемонијата се очекува да присуствуваат илјадници луѓе.
Младиќ почина на 27 август во Хаг, на 84-годишна возраст, додека ја издржуваше доживотната казна затвор за геноцид, воени злосторства и злосторства против човештвото извршени за време на војната во Босна и Херцеговина.
Неговото враќање во Србија и начинот на кој беше пречекан предизвикаа бројни реакции во регионот и во Европската Унија. Телото беше донесено во Белград со авион на српската влада, а ковчегот беше пречекан со воени почести.
Европската комесарка за проширување Марта Кос ја откажа планираната посета на Србија, оценувајќи дека „величењето“ на Младиќ е спротивно на европските вредности и на процесот на пристапување кон ЕУ.
Од друга страна, српскиот претседател Александар Вучиќ изјави дека нема да присуствува на погребот, но ја отфрли критиката од Брисел. Тој праша дали Србија требало да го забрани погребот или да им забрани на граѓаните да присуствуваат.
Погребот повторно ги отвори и поделбите околу наследството од војните во поранешна Југославија. Додека дел од Србите го сметаат Младиќ за херој, во Босна и Херцеговина тој е симбол на злосторствата и страдањата од војната. Младиќ беше осуден за својата улога во геноцидот во Сребреница и опсадата на Сараево.
