Основното јавно обвинителство Охрид поднесе обвинение против две физички и две правни лица поради смртта на Кристијан Љушев, кој на 12 јануари годинава загина откако падна во необезбедено лифтовско окно во зграда во изградба во Охрид.
Според обвинителството, Љушев бил ангажиран како помошник-монтер за внесување мебел. Додека со други работници се наоѓал на четвртиот кат, се сопнал од кофа оставена во ходникот, изгубил рамнотежа и паднал низ отворот за лифт во подрумските простории. Од тешките повреди починал на самото место.
Истрагата утврдила сериозни пропусти во обезбедувањето на градилиштето. Окното за лифт не било оградено, на скалите немало заштитни огради, а влезот во објектот не бил обезбеден од пристап на неовластени лица. Во ходниците имало и оставен градежен отпад.
Одговорното лице во фирмата-инвеститор се товари дека не ги презело задолжителните мерки за безбедност и заштита при работа. Другата фирма и нејзиниот управител се обвинети дека го ангажирале Љушев без договор за вработување, без претходен здравствен преглед и без задолжителна обука за безбедност и здравје при работа.
„Дозволиле оштетениот да извршува работни задачи како помошник-монтер без да помине основна обука за безбедност и здравје при работа, без здравствен преглед и без да му дадат упатства за работа во специфични услови и при сериозен и зголемен ризик“, соопшти Обвинителството.
Обвинетите се товарат за повеќе кривични дела поврзани со загрозување на општата сигурност, предизвикување општа опасност, повреда на правата од работен однос и непреземање мерки за заштита при работа.
Јавниот обвинител до Основниот суд во Охрид доставил и предлог за забрана на статусни промени во двете обвинети компании, со цел да се спречи отуѓување на имотот или промени во нивниот статус додека трае судската постапка.









