Царинските службеници спречиле обид за нелегален увоз на 2,8 тони нејодирана сол, откако при контрола на пратка пријавена како индустриска сол утврдиле дека станува збор за поинаков производ од оној наведен во документацијата.
Увозникот, кој е производител на храна, доставил изјава дека солта ќе се користи исклучиво за индустриски цели. Сепак, при проверката на пратката, Царинската испостава Скопје 3 утврдила дека станува збор за нејодирана сол, а не за индустриска сол, како што било наведено во увозната декларација.
Според македонските прописи, солта наменета за исхрана задолжително мора да биде јодирана, поради можните штетни последици од употребата на нејодирана сол врз здравјето на граѓаните.
Против осомничените е поведена соодветна постапка, а по решение на Агенцијата за храна и ветеринарство, целата количина од 2,8 тони била уништена на депонијата „Дрисла“.
Случајот е откриен при редовните царински контроли, со кои се проверува усогласеноста на пријавената стока со вистинската содржина на увезените пратки.








