Банкарскиот систем е стабилен и отпорен, порачува Народната банка, посочувајќи дека одлуката на Народната банка на Србија за одземање на дозволата за работа на Алта банка АД Белград не значи автоматско одземање на дозволата за работа на Алта банка АД Битола.
Од Народната банка нагласуваат дека домашната банка е самостојно правно лице, основано и регистрирано во земјава, а нејзиното работење е предмет на непосреден супервизорски надзор од македонскиот регулатор.
„Народната банка внимателно ги следи сите околности и ризици поврзани со работењето на домашната банка и постапува независно, професионално и во согласност со законските надлежности“, се наведува во соопштението.
Народната банка на Србија ја одзеде дозволата за работа на Алта банка
Истовремено, од централната банка апелираат јавноста да се потпира на официјални и проверени информации и да не донесува заклучоци врз основа на непотврдени тврдења и шпекулации. Сигурноста на банкарскиот систем и заштитата на депонентите, нагласуваат оттаму, остануваат во фокусот на институцијата.
Реакцијата следува откако Извршниот одбор на Народната банка на Србија ѝ ја одзеде дозволата за работа на АЛТА банка АД Белград. Како причини за одлуката се наведуваат значителното влошување на финансиската состојба и ризикот за ликвидноста, односно способноста на банката навремено да ги исполнува обврските кон клиентите. На одземањето на дозволата му претходеле контролни активности насочени кон зголемување на ликвидноста на банката.
Белградската Алта банка минатата година ја презеде Стопанска банка Битола. По добиените согласности од Народната банка, измената на Статутот и уписот во Централниот регистар, на 12 декември 2025 година банката официјално го променила името во АЛТА банка АД Битола. Токму сопственичката поврзаност со банката во Србија го отвори прашањето за можните последици врз нејзиното работење во земјава.
Од АЛТА банка АД Битола, пак, соопштија дека банката е ликвидна и продолжува со стабилно и непречено работење, како и дека настаните поврзани со банката во Србија не значат автоматска промена на нејзината финансиска состојба и правен статус.
Редици пред Алта банка во Нови Сад – граѓаните масовно вадат пари
