Mинистерката за образование и наука Весна Јаневска, ги повика учениците да си побараат братче или сестриче со цел да се смени поразителната демографска статистика во државата, со оглед дека денеска има 433 паралелки помалку во основно и во средно, како и 148 затворени подрачни и регионални училишта.
„Ја користам приликата да ја информирам јавноста дека ако продолжиме вака, постојано ќе затвораме училишта. Ние пред три години направивме сликовница за прво, второ и трето одделение што се вика „Јас, мама, тато, дада и бато“. Оттука порака за првачињата: освен тоа што ќе побараат да стекнат знаење, можеби треба да побараат да стекнат и братче и сестриче, за да можеме повторно овие привремено затворени училишта, во иднина да ги отвораме“, порача Јаневска од ООУ „Ацо Шопов“ во Општина Бутел.
Според неа, јасно е дека демографскиот проблем нема да се реши со сликовница но рече, населението треба да биде свесно колку човечкиот капитал е значаен за нив самите првенствено, за нивниот живот и секако за нивната држава.
Демографскиот пад е главната причина за намалувањето на бројот на ученици и затворањето на дел од училиштата во земјава, изјави денеска премиерот Христијан Мицкоски, одговарајќи на новинарско прашање на почетокот на новата учебна година.
Според податоците што ги изнесе Мицкоски, во 2025 година во Македонија се родиле околу 15.650 деца, додека во годините пред пандемијата бројката се движела меѓу 22.000 и 23.000 новородени годишно.
„Станува збор за 7.000 до 8.000 деца помалку во рок од седум-осум години“, рече Мицкоски.
Тој направи споредба според која таквото намалување, доколку се пресметаат по 20 ученици во паралелка, би значело околу 350 паралелки помалку, односно капацитет што одговара на приближно 70 училишта со по пет паралелки.
Премиерот оцени дека демографијата учествува со околу 90 проценти во проблемот со намалувањето на бројот на ученици, а како дополнителен фактор го посочи и иселувањето.
Мицкоски кажа дека Владата ќе се обиде да го стабилизира падот на бројот на населението, а потоа да создаде услови за негово зголемување, оценувајќи дека со слични демографски предизвици се соочуваат и други европски земји.
Оваа учебна година е посиромашна за 433 паралелки, од кои 222 во основно и 211 во средно образование откако Министерството за образование реши да ги спои малите паралелки во една поголема.
Вкупната бројка на празни училишни објекти во Македонија, претежно во руралните средини е 148. Негативниот тренд, поттикнува и реорганизација на училишната мрежа и работата на училиштата.
