Во Основниот кривичен суд во Скопје продолжува судењето за случајот „Државна лотарија“, во кој осум лица се обвинети за злоупотреба на службената положба и овластување во врска со набавката на видеолотариски терминали.
На денешното рочиште во судницата за првпат ќе се појави и поранешниот директор на „Државна лотарија“, Перпарим Бајрами. Тој до неодамна беше недостапен за органите на прогонот и му се судеше во отсуство, но на 9 септември се предаде на полицијата откако пеш ја премина границата кај Блаце. По неговото приведување, Бајрами беше спроведен во затворот „Скопје“ во Шуто Оризари.
Падот на Перпарим Бајрами – хронологија на аферите во Државна лотарија
Со неговото појавување во судницата, процесот продолжува со сите осум обвинети. Меѓу нив се и поранешниот прв вицепремиер Артан Груби и поранешниот генерален секретар на Владата, Методија Димовски, како и уште петмина поранешни членови на Надзорниот одбор на „Државна лотарија“.
Обвинението се однесува на одлуки донесени во 2023 и 2024 година за самостојно приредување електронски игри на среќа и набавка на видеолотариски терминали. Според Обвинителството, „Државна лотарија“ немала право самостојно да организира вакви игри, бидејќи тоа право уште во 2013 година било вложено како непаричен влог во заедничкото друштво со „Касинос Аустрија“, во кое Лотаријата има 51 отсто од сопственоста.
И покрај тоа, според обвинението, биле преземени активности за набавка на видеолотариски терминали, а склучените договори биле во вредност од повеќе од 500 милиони денари. Обвинителството тврди дека со постапките на „Државна лотарија“ ѝ била нанесена штета од околу 8,2 милиони евра.
Судењето започна во август, но досегашниот тек беше проследен со одложувања, меѓу другото и заради увид на одбраната во доказниот материјал. На почетокот на постапката обвинетите се изјаснија дека не се чувствуваат виновни.
