Неплатени сметки за електрична енергија утрово ги оставиле факултетите и Ректоратот на Универзитетот „Св. Кирил и Методиј“ без струја, тврди Левица. Од партијата предупредуваат дека со сличен проблем може да се соочат и „Пошта на Република Македонија“ и дел од културните установи.
Во партиското соопштение се оценува дека ваквата состојба е показател за лошото управување со јавните институции и несоодветните приоритети на власта. Од Левица велат дека додека се прават партиски кадровски распределби, институциите не успеваат да ги подмират ниту основните трошоци за работа.
Партијата потсетува дека и студентските домови претходно се соочувале со прекин на снабдувањето со електрична енергија. Според нивните наводи, во февруари годинава студентите во домот „Никола Карев“ во Охрид останале без струја, греење и топла вода за време на испитната сесија.
Истата установа, како што наведуваат од Левица, во јуни повторно била без струја цела недела, поради долг поголем од три милиони денари. Во меѓувреме, во студентскиот дом „Пелагонија“ електричната енергија била исклучена поради неплатени обврски над седум милиони денари.
Од партијата бараат долговите на јавните установи итно да се подмират, да се обезбеди непречена работа на универзитетите и да се утврди одговорност за состојбата. Според Левица, средствата од јавниот буџет треба пред сè да бидат насочени кон функционирање на јавните услуги.









