Најавениот целосен прекин на товарниот сообраќај и блокада на граничните премини кон Европската Унија од страна на превозниците од Западен Балкан засега нема да се реализира. Транспортните здруженија од Македонија, Србија, Босна и Херцеговина и Црна Гора одлучија привремено да ги стават најавените блокади во мирување, откако добија уверувања дека ќе се работи на забрзано изнаоѓање решение за проблемот со правилото за престој на професионалните возачи.
Протестот со целосен прекин на товарниот сообраќај и затворање на границите кон Европската Унија беше најавен за 14 септември 2026 година. Причината за незадоволството е примената на шенгенското правило 90/180, според кое државјаните на трети земји можат да престојуваат најмногу 90 дена во рамките на период од 180 дена.
Превозниците сметаат дека ваквото ограничување не одговара на специфичноста на нивната работа. Проблемот, според транспортните здруженија, веќе има конкретни последици. Возачи кои го надминуваат дозволениот број денови се враќаат од граничните премини, се соочуваат со високи парични казни и депортации, а транспортните компании дополнително се соочуваат со недостиг на професионален кадар.
На 1 септември 2026 година, превозниците од регионот одржаа предупредувачки протести пред претставништвата на Европската Унија во Скопје, Белград, Сараево и Подгорица. По овие активности следуваше средба со претставници на земјите членки на Шенген-зоната, која беше организирана преку Мисијата на Европската Унија во Белград.
Разговорите резултираа со одлука на здружението Макам-транс и останатите регионални транспортни организации да не го реализираат засега најавениот протест. Одлуката е оценета како чекор на добра волја, со кој би се избегнал целосен прекин на регионалните синџири на снабдување и би се оставил простор за продолжување на институционалниот дијалог.
И покрај тоа што блокадите се ставени во мирување, превозниците не се откажуваат од барањето за трајно решение. Тие очекуваат Европската Унија да преземе конкретни чекори, а проблемот да биде надминат до конечното усвојување на новата визна стратегија, која е најавена за втората половина на 2027 година.
Во меѓувреме, државите од Западен Балкан разгледуваат и други можности. Министерот за транспорт Александар Николовски изјави дека, доколку на ниво на Европската Унија нема единствен став, владите ќе настојуваат да постигнат билатерални договори со одделни земји членки на Шенген-зоната.
Во таа насока веќе се разговарало со неколку држави, додека за септември и октомври 2026 година се најавени специјални средби на високо ниво со владите на Австрија и Словенија. Сепак, и покрај билатералните иницијативи, на ниво на целата Европска Унија сè уште нема системско решение за проблемот. Тоа продолжува да создава неизвесност за околу 17.000 професионални возачи во Македонија и приближно 100.000 возачи во целиот регион на Западен Балкан.
