МВР поднесе кривични пријави против девет физички лица и едно правно лице поради сомнежи за злоупотреба на службената положба и овластување и фалсификување исправа при јавни набавки во Управата за хидрометеоролошки работи (УХМР). Според МВР, со спорните постапки на две фирми од Скопје и Битола им била овозможена противправна имотна корист од вкупно 30 милиони денари, односно околу 487.715 евра.
Меѓу пријавените е и И.Т. (53), вршител на должноста директор на УХМР, за кого полицијата се сомнева дека донел две одлуки за набавки за ист настан, иако постапките наводно биле правно нецелосни и процедурално неисправни. Според наводите на МВР, наместо постапката да се спроведе врз основа на спецификација со вкупните потребни количини на услуги, била користена изменета спецификација со единечни количини. Исто така, одлуките за избор биле донесени без претходно изготвени и потпишани записници за отворање на понудите и извештаи за спроведените постапки.
Во првиот случај, директорот склучил договор со фирма од Скопје за набавка на услуги, со што, според истрагата, ѝ била овозможена противправна имотна корист од 29.244.786 денари, или околу 475.000 евра. МВР наведува дека понудата на фирмата била доставена со задоцнување и не ги исполнувала условите од документацијата, а фактурите што биле доставувани не соодветствувале на понудените цени и обемот на извршените услуги.
Вториот случај се однесува на договор со фирма од Битола за печатење промотивни и работни материјали и набавка на ситен инвентар. Според полицијата, на оваа фирма ѝ била овозможена противправна имотна корист од 782.050 денари, односно околу 12.715 евра. Понудата, според наводите, била технички неисправна, но сепак била избрана за склучување договор.
Во кривичните пријави се опфатени и претседателот и двајца членови на комисијата за јавната набавка, како и вработени задолжени за подготовка, одобрување и финансиска контрола. МВР се сомнева дека тие ги прифатиле спорните понуди и одобриле исплати без соодветна документација и докази, иако постоеле неправилности во постапките. Пријавен е и управителот на фирмата од Битола поради доставување понуда што, според полицијата, не ги исполнувала формалните и техничките услови.
Пријавите биле поднесени до Основното јавно обвинителство Скопје на 15 октомври. МВР наведува дека пријавените се сомничат за различни кривични дела во зависност од нивната улога, меѓу кои злоупотреба на службената положба и овластување, соизвршителство и фалсификување исправа.
