Повеќе лица од Фондот за здравствено осигурување (ФЗО) и од приватна здравствена установа се опфатени со истрага за сомневања за финансиски злоупотреби поврзани со наплата на здравствени услуги. Според првичните информации, пациентите плаќале за операции на очи кои истовремено биле фактурирани и кон Фондот, со што се отвора сомнеж за двојна наплата на истите интервенции.
Во рамки на полициската акција се вршат претреси на повеќе од десет локации во Скопје, Тетово и Куманово. Акцијата ја спроведуваат полициски службеници од Одделот за сузбивање на организиран и сериозен криминал, во координација со надлежното јавно обвинителство за гонење организиран криминал и корупција.
Министерот за здравство, Сашо Клековски, рече денеска дека акцијата што ја спроведува МВР утринава е повеќемесечна, и е темелена на повеќе од една година истрага.
– Станува збор за злоупотреба на средства од Фондот за здравствено осигурување. Се надевам дека МВР наскоро ќе излезе со повеќе детали. Можам само да ја потврдам акцијата, да ја потврдам соработката и да изразам голема благодарност на истрајноста и упорноста на вработените во МВР и на Јавното обвинителство, што конечно една од ситуациите на кои работевме изминатите две години доаѓа до одредена завршница, барем во однос дека ќе има кривични пријави и судска постапка, рече Клековски.
Според досегашните неофицијални информации, под истрага се три лица поврзани со ФЗО и две лица од приватната болница. Случајот се однесува на сомневања за злоупотреба на службената положба и овластување, несовесно работење, измама и перење пари.
Според неофицијалните податоци, штетата на државниот буџет се проценува на повеќе од 1,5 милиони евра, додека сомневањата се дека приватната здравствена установа остварила противправна материјална корист од околу четири милиони евра. Во случајот се опфатени и пациенти кои, според досегашните сознанија, плаќале за услуги за кои установата веќе добивала средства од Фондот.
Меѓу лицата опфатени со истрагата, според медиумските информации, е и поранешниот директор на ФЗО, Ден Дончев. Сепак, надлежните институции засега не ги објавиле сите детали за улогата на секое од осомничените лица.
Од Министерството за внатрешни работи потврдија дека се спроведуваат претреси на повеќе локации во рамки на истрага за финансиски злоупотреби во здравствениот сектор. Повеќе информации се очекуваат по завршувањето на полициските активности и соопштувањето на деталите од надлежното обвинителство.
Истрагата треба да утврди како биле реализирани спорните плаќања, кој бил вклучен во нивното одобрување и колкав е вкупниот финансиски ефект од наводните злоупотреби.
