Коалицијата ВЛЕН реагираше на ставовите на лидерот на ДУИ, Али Ахмети, во врска со прекинот на односите со Србија, обвинувајќи го дека и понатаму ја поддржува иницијативата „Отворен Балкан“ и соработката со Белград. Од ВЛЕН сметаат дека регионалната политика на Северна Македонија треба да се насочи кон посилно поврзување со Косово и Албанија.
Од ВЛЕН велат дека Ахмети продолжува да го поддржува регионалниот проект, иако, според нив, Србија не ја признава независноста на Косово и не презела одговорност за настаните од 1999 година и нападот во Бањска.
„Регионалниот мир се гради во соработка со Србија“, е ставот што ВЛЕН му го припишува на Ахмети, оценувајќи дека таквата политика не ги зема предвид интересите на Косово.
Од коалицијата ВЛЕН посочуваат дека приоритет треба да бидат инфраструктурното и економското поврзување со Албанија и Косово. Како конкретни проекти ги наведуваат Коридорот 8, автопатот Скопје – Блаце, патот Тетово – Призрен и воведувањето систем „One Stop Shop“ на граничните премини.
Во соопштението ВЛЕН повторно го отвора и прашањето за деловните врски со Србија, споменувајќи ја Алта банка и обвинувајќи го Ахмети дека зад поддршката за регионалната соработка стојат и тесни политички и семејни интереси.
Критиките доаѓаат во време на засилена политичка дебата за надворешнополитичките приоритети на земјата и иднината на иницијативата „Отворен Балкан“.









