Управата за финансиска полиција поднесе кривична пријава против административен службеник на Универзитетот во Тетово поради проневера на над 3,3 милиони денари. Осомничениот во период од три години фалсификувал потврди за уплата, оштетувајќи го буџетот на високообразовната институција и доведувајќи ги студентите во заблуда преку злоупотреба на системот Е-pay.
Во периодот од март 2020 година до февруари 2023 година, вработениот А.З., кој ја извршувал функцијата виш соработник за логистика и теренско работење на Универзитетот во Тетово, систематски ги присвојувал готовинските средства наменети за партиципација и студиски трошоци.
А.З. примал готовина од студенти на Природно-математичкиот факултет, Факултетот за физичка култура и Факултетот за медицина.
Наместо уплата преку веб-апликацијата Е-pay, тој ги задржувал средствата за лична корист. За да ја прикрие трагата, користел QR-код од автентична потврда на неговата сестра, креирајќи фалсификувани документи со изменети податоци за уплатувачот, износот и датумот.
Вкупната противправна имотна корист што ја прибавил А.З. изнесува 3.362.272 денари, што е речиси 54.600 евра. Овој износ претставува директна штета за буџетот на Универзитетот во Тетово. Случајот е процесуиран од Управата за финансиска полиција до Основното јавно обвинителство Тетово, каде што се води постапка за две кривични дела: zлоупотреба на службената положба и овластување и фалсификување исправа.
