Судот му го укина притворот на Игор Дашковски Стојановски, кој призна вина за палењето на двете дипломатски возила пред бугарската амбасада, па правосилноста на пресудата ќе ја чека на слобода.
Во образложението на одлуката, Судот наведува дека Стојановски досега издржал околу половина од изречената казна затвор од осум месеци, поради што смета дека опасноста од бегство е значително намалена. Како аргумент во прилог на укинувањето на притворот се земени предвид и признанието на вината, неговото однесување за време на судските рочишта, како и личните околности, меѓу кои и фактот дека има малолетно дете во Македонија.
„Обвинетиот даде признание на вина што укажува дека ја прифати одговорноста, а тоа не дава основ за заклучок дека би се дал во бегство за да го избегне правосилното завршување на постапката“, наведуваат од Судот.
Во образложението се посочува и дека Стојановски има постојано и познато место на живеење во земјава, дека коректно се однесувал пред судот и не ја оспорувал фактичката состојба. Дополнително, Судот оценил дека во оваа фаза не биле презентирани нови докази или конкретни околности што би ја оправдале потребата од продолжување на притворот.
При одлучувањето била земена предвид и практиката на Европскиот суд за човекови права, според која, со одминувањето на времето, продолжувањето на притворот мора да биде поткрепено со сè поконкретни и поубедливи аргументи.
Наместо притвор, на Стојановски му е определена мерка за редовно јавување еднаш неделно, секоја среда, во периодот од 9:30 до 12 часот, пред одговорен службеник во Одделението за организиран криминал и корупција при Основниот кривичен суд Скопје. Оваа мерка ќе важи до правосилното завршување на кривичната постапка.
Инцидентот се случи на 15 јуни годинава, околу пладне, кога обвинетиот запали две дипломатски возила паркирани пред бугарската амбасада на булеварот „Митрополит Теодосиј Гологанов“. Според обвинението, тој претходно набавил бензин во пластично шише од блиска бензинска пумпа, со кој ги полеал автомобилите, ги запалил и потоа го напуштил местото.
Првичната постапка ја водеше Основното јавно обвинителство Скопје, но предметот подоцна го презеде Обвинителството за гонење организиран криминал и корупција. Обвинението беше поднесено на 16 септември, а на обвинетиот му се става на товар кривичното дело загрозување лица под меѓународна заштита, бидејќи со палењето, според Обвинителството, создал сериозна опасност по животот на лица под меѓународна заштита.
„Сам одлучив“ – обвинетиот за палењето на бугарските возила призна вина









