Петнаесет раководители од српската Служба за борба против дрога биле отстранети од своите дотогашни позиции по големата заплена на пет тони марихуана во селото Коњух, во близина на Крушевац. Според истражувањето на српскиот портал „Крик“, полицајците тврдат дека по акцијата биле изложени на притисоци, а дел од нивните сопруги, кои исто така работат во Министерството за внатрешни работи, биле сменети од работните места.
„Крик“ објави делови од писмо испратено до српскиот премиер Ѓуро Мацут. Писмото го потпишале 13 полицајци, кои побарале средба со премиерот за да ги изложат проблемите со кои, како што наведуваат, се соочиле по заплената. Според објавените информации, досега не добиле одговор на барањето.
Полицајците тврдат дека промените започнале веднаш по акцијата: сменети биле началникот и заменик-началникот на службата, раководителите во нејзините одделенија, како и други полициски функционери. Потоа, според нивното писмо, следувале прераспределувања на различни работни места, меѓу кои граничната и сообраќајната полиција, како и други служби.
Заплената во Коњух се случи на почетокот на 2026 година и беше една од најголемите во Србија. Петте тони марихуана биле пронајдени на имот поврзан со локален функционер на владејачката Српска напредна партија. Српските истражители потоа соработувале со колегите од Македонија, каде што, според објавените полициски информации, биле откриени и запленети дополнителни над 40 тони дрога поврзана со истата криминална група.
Во писмото до премиерот, полицајците наведуваат дека со години работеле на сложени истраги и меѓународни операции против шверцот со дрога. Тие сметаат дека нивното отстранување од службата, наместо да биде проследено со признание за резултатите, ја ослабнало единицата и ја загрозило нивната и безбедноста на нивните семејства.
Од „Крик“ објавуваат дека поранешниот началник Радомир Поповиќ бил прераспределен во службата за воени злосторства, додека неговиот заменик Никола Ѓоковиќ бил преместен во сообраќајната полиција. Другите раководители биле распоредени во различни полициски сектори.
Полицајците барале разговор и со други високи претставници на српското МВР, но, според нивните наводи, не добиле одговор. Тие предупредуваат дека по заплената криминалната група претрпела големи финансиски загуби, па затоа се загрижени за сопствената безбедност.
Наводите за притисоци и причините за прераспределувањето се изнесени од полицајците и во истражувањето на „Крик“. Во објавените информации нема одговор од српските институции на нивните обвинувања.
