Најголемата светска криптоберза „Бајнанс“ (Binance) се соочува со еден од најсериозните безбедносни инциденти во историјата на криптовалутите, откако хакери успеале да пристапат до нејзините системи и да иницираат неовластени трансакции со дигитални средства вредни околу 6,3 милијарди долари.
Нападот се случил на 29 октомври, а првичната истрага укажува дека пристапот можеби бил овозможен преку компромитиран лаптоп на еден од инженерите задолжени за техничката инфраструктура на компанијата. Од „Бајнанс“ соопштија дека нема докази за протекување на приватните клучеви на дигиталните паричници и уверуваат дека средствата на корисниците се безбедни.
Компанијата, во соработка со партнери од криптоиндустријата, успеала да замрзне околу три милијарди долари од погодените средства. Во акцијата учествувале и издавачите на стабилните криптовалути USDT и USDC – „Тетер“ и „Серкл“, кои блокирале средства во вредност од околу 1,77 милијарди, односно 825 милиони долари.
Од „Бајнанс“ најавија дека евентуалните загуби ќе бидат покриени со сопствени средства и преку фондот SAFU, наменет за заштита на корисниците во вонредни ситуации.
Според анализата на компанијата TRM Labs, зад нападот најверојатно стои севернокорејската хакерска група „TraderTraitor“. Истражувачите проценуваат дека напаѓачите префрлиле околу 6,36 милијарди долари од дигиталните паричници на „Бајнанс“, користејќи десет различни блокчејн-мрежи. Значителен дел од трансакциите биле извршени во период од само дваесетина минути.
Сомнежите се засилуваат поради сличностите со претходни кибернапади поврзани со Северна Кореја, меѓу кои и нападот врз криптоберзата „Бајбит“ во февруари 2025 година, кога беа украдени околу 1,5 милијарди долари. Доколку се потврди одговорноста на групата, станува збор за напад што го надминува досегашниот рекорд во криптоиндустријата.
Од „Бајнанс“ засега не го потврдуваат идентитетот на напаѓачите, а истрагата ја спроведуваат во соработка со органите за спроведување на законот и специјализирани компании за следење на блокчејн-трансакции. Како мерка на претпазливост, привремено беа суспендирани уплатите и повлекувањата на средства додека траат безбедносните проверки.
Нападот предизвика потрес и на криптопазарот. Биткоинот забележа пад од повеќе од три проценти, а негативни движења беа регистрирани и кај други водечки криптовалути, вклучително и етериумот и соланата.
