Александар Вучиќ ги отфрли тврдењата на британскиот весник „Тајмс“ дека во изборната ноќ планирал со насилство да ја спречи промената на власта. Тој ги негираше и информациите дека се откажал од таквиот наводен план по телефонски предупредувања од странски претставници.
„До тој момент, никој однадвор не ме повика. Никој“, изјави Вучиќ, објаснувајќи дека одлуката да го признае поразот ја донел откако ги видел резултатите од изборите.
Според неговото објаснување, првичните податоци од помалите избирачки места покажувале дека неговата листа води, но резултатите од стратифицираниот примерок укажале на убедлива предност на противниците, особено во Белград и Војводина.
Вучиќ рече дека околу 21:30 часот проценил дека нема смисла да се продолжи со броењето и да се одржува тензијата, па решил да го признае поразот и да им честита на политичките противници. Според него, очекувал тие потоа да ја преземат власта и да ја прослават победата.
Во обраќањето, тој упати и критики кон студентското движење, обвинувајќи го дека по изборната победа врши „гол терор“ врз политичките неистомисленици.
Британски „Тајмс“ претходно објави дека Вучиќ бил подготвен да ја поништи изборната волја и да ја задржи власта по секоја цена. Весникот, повикувајќи се на извори од дипломатски и полициски кругови, наведува дека планот наводно бил напуштен откако станало јасно дека Студентската листа победила со разлика од околу половина милион гласови, како и по предупредувачки повици од странство.
Поранешниот командант на српската Специјална антитерористичка единица, Спасоје Вулевиќ, за „Тајмс“ изјавил дека властите испратиле 4.000 полицајци и околу 3.000 лица кои ги опишал како бандити во центарот на Белград, наводно под изговор дека се очекуваат провокации и немири поради кои би можеле да бидат поништени изборите.
И европратеникот Сандро Гози потврдил дека дипломатските кругови во неделата добиле алармантни информации за наводни подготовки за државен удар. Во медиумските извештаи се наведува и дека европски претставници интервенирале во последен момент за да спречат ескалација на насилството.
Според изворите на „Тајмс“, околу 21:30 часот почнале да се повлекуваат групите мажи облечени во црно, а полициското присуство во центарот на Белград било намалено. Тоа се случило откако, според нивните тврдења, станало јасно дека разликата во гласовите е преголема за да може да се оспори изборниот исход без сериозни политички последици.
