Владата ја продолжува мерката со која данокот на додадена вредност за дизел-горивото се намалува од 18 на 10 проценти. Мерката ќе важи до 12 октомври, соопшти министерката за финансии Гордана Димитриеска-Кочоска.
Намалувањето на ДДВ за дизелот започна да се применува на 15 септември, како мерка за ублажување на ценовниот притисок врз граѓаните и економијата.
Димитриеска-Кочоска вели дека со продолжувањето на мерката Владата влијае врз малопродажните цени на горивата и го ограничува пренесувањето на повисоките цени на енергенсите врз останатите производи и услуги.
„Со продолжувањето на оваа мерка директно влијаеме врз малопродажните цени на горивата и го ограничуваме пренесувањето на надворешните ценовни притисоци врз цените на останатите производи и услуги“, наведе министерката.
Одлуката доаѓа во период на значителни промени на цените на горивата. Минатата недела дизелот поскапе за 5,50 денари и достигна цена од 104,50 денари за литар, додека бензините поевтинија за 1,50 денари.
Новите максимални цени на горивата за следниот период треба да ги утврди Регулаторната комисија за енергетика.
