По 30 години пауза, средното полициско училиште повторно станува реалност во Македонија – 310 ученици денеска за првпат седнаа во клупа во средното полициско училиште ,,7 мај”.
Министерот за внатрешни работи Панче Тошковски истакна дека овој ден претставува историски чекор за реформата и модернизацијата на полициските служби во државата.
,,1 септември 2026 година, конечно, по 30 години од последниот упис во рамките на Средното полициско училиште во Македонија, имаме нова генерација идни полициски службеници, кои ќе имаат своја професија – полициски службеник во Македонија со завршено средно полициско училиште за две години од сега “, изјави Тошковски.
Тој упати искрени честитки до сите новозапишани ученици што ја избраа, како што посочи, оваа одговорна и чесна професија.
,,Нека им е честито на сите дечиња што се запишаа во рамките на Средното полициско училиште. Сигурен сум дека за две години од сега, со посветена и макотрпна работа, со трудот што ќе биде даден и од страна на професорите, и од страна на менторите, и од страна на сите оние едукатори коишто ќе бидат вклучени во процесот, а најмногу од страна на учениците, ќе можеме да се гордееме со нова бројка на полициски службеници коишто имаат завршено Средно полициско училиште”, нагласи министерот.
Тошковски упати благодарност до сите институции и тимови кои работеа на реализација на овој проект изминатите две години.
,,Нека ни е со среќа на сите. Огромна благодарност уште еднаш до сите оние коишто макотрпно работеа изминативе две години за денеска да го дочекаме и овој ден, после 30 години во Македонија повторно да имаме државно Средно полициско училиште”, рече Тошковски.
Во однос на капацитетите, тој појасни дека првичниот план предвидувал прием на 200 кандидати, но поради огромниот интерес и потребите од реформи, бројката е зголемена.
Од ресорното министерство истакнаа и дека над 40 ученици од вкупната бројка на запишани се од останатите етнички заедници во земјава, а појаснија и дека се надеваат оти интересот за упис ќе порасне во наредните години.
