Северна Кореја подготвува дополнителни 10.000 војници за испраќање во Русија, додека на руска територија веќе се наоѓаат повеќе од 8.000 севернокорејски војници, изјави украинскиот претседател Володимир Зеленски.
Зеленски, повикувајќи се на нови разузнавачки информации, соопшти дека војниците се избираат и подготвуваат за обука, по што треба да бидат префрлени во Русија. Според него, Москва продолжува да ја проширува соработката со Пјонгјанг во воената сфера, вклучително и преку ангажирање дополнителен воен персонал.
Украинскиот претседател посочи дека Русија ја зголемува и регрутацијата на војници, вклучително и странски државјани, користејќи различни методи за нивно ангажирање во војната против Украина.
Според Зеленски, воената соработка меѓу двете земји не се ограничува само на испраќање војници. Русија, како што тврди тој, ѝ обезбедува на Северна Кореја технологии и друга поддршка во замена за воена помош.
Тој изјави дека со руска технолошка помош на севернокорејска територија започнало и производството на ударни дронови од типот „Шахед“, кои Русија ги користи во нападите врз Украина.
Зеленски предупреди дека ваквата соработка ја проширува безбедносната закана и надвор од украинското боиште, оценувајќи дека за нејзино спречување е потребен заеднички одговор од меѓународната заедница.
Претходно, во август, украинскиот претседател изјави дека бројот на севернокорејски војници што би можеле да бидат испратени во Русија би можел да достигне и до 50.000.
Покрај воениот персонал, Пјонгјанг ѝ обезбедува на Москва и артилериска муниција, балистички ракети и други вооружени системи.
