Шпанскиот премиер Педро Санчез распиша предвремени парламентарни избори за 29 ноември, по политичкиот удар што неговата малцинска влада го претрпе во парламентот околу мерките за справување со станбената криза.
Санчез одлуката ја соопшти во вонредно телевизиско обраќање, по викендот во кој се консултирал со најблиските соработници и членови на својата влада. Тој најави дека ќе биде свикан вонреден Совет на министри за распуштање на парламентот и формално распишување на изборите.
Одлуката следува само неколку дена откако шпанскиот Конгрес ги отфрли двата владини декрети поврзани со станбената криза. Мерките предвидуваа, меѓу другото, ограничувања поврзани со иселувањата, како и други мерки за подобрување на пристапот до домување.
За нив гласаа против Народната партија, Вокс и каталонската партија Јунтс, што ја остави владата без доволно поддршка за нивно усвојување.
Станбената криза во последните недели предизвика масовни протести низ Шпанија, со барања од властите да преземат поефикасни мерки поради растот на цените на недвижностите и кириите.
Санчез призна дека неговата влада направила грешки и дека не успеала да реализира дел од планираните мерки, но порача дека за спроведување на дополнителни реформи е потребна поширока парламентарна поддршка.
„Дојде моментот Шпанците да одлучат каква иднина сакаат за себе и за својата земја“, порача Санчез во обраќањето.
Владата на Санчез веќе подолг период функционира со тесна и нестабилна парламентарна поддршка, што го отежнува усвојувањето на законите и клучните политики.
На изборите на 29 ноември, шпанските граѓани ќе избираат нов состав на парламентот, а резултатот ќе го одреди составот на идната влада.
