Политичката партија Левица поднесе интерпелација за работата на министерката Сања Божиновска во Собрание на Република Северна Македонија, ставајќи го во фокус работењето на Министерство за енергетика, рударство и минерални суровини.
Партиската аргументација се темели на тврдењата дека државното претпријатие АД ЕСМ се соочува со сериозни финансиски тешкотии и нови задолжувања на банкарскиот пазар.
„Под раководство на Божиновска, ЕСМ се турка во нови задолжувања, додека произведената струја се продава под производната цена. Во исто време, фирмите под капата на ЕВН остваруваат десетици милиони евра профит, а граѓаните плаќаат сè повисоки сметки за струја и парно, поскапо гориво и мрежни трошоци. Додека ЕСМ финансиски се ослабува, се отвора и пат за дополнително слабеење на државната сопственост во енергетиката. Новата законска рамка го заменува поимот „државно производство“ со поширокото „домашно производство“, додека Министерството нема јасен одговор ниту што се случува со државниот пакет од 10% акции во ЕВН Македонија. Паралелно, ЕСМ склучува милионски договори со приватни фирми – меѓу нив и две рамковни спогодби со „Топлина“ за речиси 2 милијарди денари, со само еден понудувач – додека државата увезува три милиони тони јаглен од Обилиќ и покрај неискористените домашни наоѓалишта и железничката инфраструктура“, пишува во интерпелацијата на Левица.
Покрај енергетиката, во интерпелацијата се отвараат прашања поврзани со концесиите и заштитата на животната средина во рударскиот сектор. Посебно се нагласува случајот со рудникот САСА, каде проценетите трошоци за затворање и постзатворски мониторинг изнесуваат 61 милиони долари, додека прифатената банкарска гаранција од државата е на ниво од 400.000 долари. Критики се упатени и за состојбите со јаловиштата во рудниците Тораница, Бучим и Злетово, како и за неизпредените долгорочни стратегии за проектот Иловица-Штука.
Од Левица сметаат дека со овие постапки се префрла финансискиот и еколошкиот ризик врз државата и граѓаните, додека концесионерите ги задржуваат профитите, а институциите не вршат соодветен надзор над користењето на минералните суровини.
