Американскиот потпретседател Џеј Ди Венс прави сè поочигледни обиди да се дистанцира од дел од политиките на претседателот Доналд Трамп, во период кога сè почесто се споменува како можен кандидат на Републиканската партија на претседателските избори во 2028 година.
Според анализата на Си-Ен-Ен, по тешкиот пораз на републиканците на американските меѓуизбори, Венс објавил опсежна порака на социјалната мрежа Икс, во која ги критикува изборната стратегија на партијата и нејзиниот пристап кон економските проблеми. Тој посочил дека републиканците не успеале доволно да одговорат на незадоволството на граѓаните поради зголемените трошоци за живот.
Особено внимание привлече неговата критика за војната со Иран, за која Венс оцени дека била една од главните причини за изборниот неуспех. Тој ги повика поддржувачите на воениот конфликт да објаснат дали сметаат дека тој бил оправдан, ако последицата е губење на контролата врз Сенатот во следните шест години.
Ова е поинаков тон од оној на Трамп, кој и по изборниот пораз продолжи да ја брани одлуката за воена интервенција, оценувајќи дека таа била исправна.
Покрај надворешната политика, потпретседателот најави и можност за промени во начинот на спроведување на имиграциската политика. Наместо фокусот да биде исклучиво врз мигрантите кои престојуваат нелегално во САД, тој предложи поголемо внимание да се посвети на компаниите што ги вработуваат.
Венс ги посочи и инфлацијата, животниот стандард, политиката „Америка на прво место“ и односите со Израел како прашања на кои републиканците треба повторно да се фокусираат. Неговите пораки се толкуваат како обид да привлече дел од разочараните гласачи, без целосно да се откаже од политичкото наследство на Трамп.
Според Си-Ен-Ен, станува збор за внимателно позиционирање пред можната претседателска кандидатура во 2028 година. Венс се соочува со предизвикот да изгради сопствен политички идентитет, а истовремено да ја задржи поддршката од движењето МАГА и гласачите лојални на актуелниот претседател.
Од друга страна, демократите веќе го обвинуваат дека се обидува да се огради од одлуките на администрацијата во која и самиот има висока функција и активно учествува. Тие сметаат дека не може да ја префрли одговорноста за неуспесите на Трамп, откако досега беше еден од неговите најгласни поддржувачи.
Венс претходно најави дека одлуката дали ќе се кандидира за претседател во 2028 година ќе ја донесе по меѓуизборите.
