Поранешниот српски министер и актуелен претседател на Надзорниот одбор на „Србијагас“, Александар Вулин, се огласи од Москва, откако авионот со кој патуваше од Белград кон руската престолнина беше принуден да се врати на белградскиот аеродром поради дополнителни безбедносни проверки.
Во видеообраќање објавено на социјалните мрежи, Вулин потврди дека пристигнал во Москва, демантирајќи ги шпекулациите дека ја напуштил Србија за да избегне евентуална одговорност.
„Не сум избегал никаде. Ниту би заминал некаде без моето семејство“, порача Вулин, додавајќи дека во Русија отпатувал службено и дека го очекуваат повеќе средби поврзани со продолжувањето на гасниот аранжман меѓу Србија и Русија.
Инцидентот се случи во вторникот вечерта, кога авионот на „Ер Србија“, на редовната линија Белград – Москва, полета од аеродромот „Никола Тесла“, но подоцна го промени правецот и се врати во Белград. Од авиокомпанијата соопштија дека добиле информација од надлежните служби која наложувала дополнителни безбедносни проверки на еден од патниците.
Според информациите објавени во српските медиуми, патникот за кого биле побарани дополнителни проверки бил токму Вулин. Наводно, тој поминал низ безбедносната контрола без да ги заврши сите задолжителни процедури, а при неговото поминување се активирал и алармот, но не била извршена дополнителна проверка.
Случајот сега е предмет на истрага. Третото основно јавно обвинителство во Белград најави дека ќе ја испита целата постапка на аеродромот, ќе ги обезбеди снимките од видеонадзорот и ќе ги сослуша лицата кои имаат сознанија за настанот. Особено ќе се утврдува како патникот успеал да помине низ безбедносната зона во придружба на припадник на Безбедносно-информативната агенција (БИА), без да биде подложен на целосен преглед.
Вулин ги отфрли обвинувањата дека ги заобиколил безбедносните процедури. Во изјава за телевизијата „Информер“ рече дека во авионот спиел кога дознал дека летот се враќа во Белград, а по слетувањето повторно ги поминал проверките заедно со останатите патници.
„Кај мене не е пронајдено ништо незаконско, затоа што ништо такво не можело ни да има“, изјави тој, оценувајќи дека враќањето на авионот било обид за политички притисок врз него.
На истиот лет, според српските медиуми, биле и директорот на „Србијагас“, Душан Бајатовиќ, како и политичарот Ненад Поповиќ. Бајатовиќ потврди дека бил во авионот и дека по враќањето во Белград сите патници и нивниот багаж биле подложени на детални проверки.
Авионот подоцна повторно полетал и пристигнал во Москва во средата наутро. Бајатовиќ изјави дека посетата е поврзана со разговори за снабдувањето со природен гас и проблемите со плаќањата по пропаѓањето на Алта банка.
Вулин важи за еден од најблиските политички соработници на поранешниот српски претседател Александар Вучиќ и за еден од најгласните застапници на проруската политика во Србија. Во минатото ги извршуваше функциите министер за одбрана, министер за внатрешни работи, директор на БИА и вицепремиер, а од 2023 година се наоѓа и на американската листа на санкционирани лица.
