Објавата на партијата на Иван Стоилковиќ со која се глорифицира осудениот воен злосторник Ратко Младиќ предизвика остри реакции и осуди од опозициските партии и политички организации во земјата, отворајќи прашања за одговорноста на владејачката коалиција предводена од ВМРО-ДПМНЕ.
На фејсбук-страницата на Демократската партија на Србите во Македонија (ДПСМ), чиј претседател Иван Стоилковиќ ја врши функцијата министер за локална самоуправа во Влада на Северна Македонија, беше објавен текст посветен на починатиот Ратко Младиќ. Во текстот, Ратко Младиќ е претставен како војник, генерал и човек кој бил во служба на својот народ, со нагласок дека многу Срби го доживувале како свој генерал во тешки моменти и така ќе го паметат, а не по Хашкиот трибунал или затворот. Оваа објава предизвика бурни реакции во јавноста со оглед на тоа што Ратко Младиќ е правосилно осуден на доживотен затвор за геноцид, воени злосторства и злосторства против човештвото, вклучувајќи го и геноцидот во Сребреница каде што беа убиени повеќе од 8.000 бошњачки мажи и момчиња за време на војната во Босна и Херцеговина.
Политичките партии СДСМ и ДУИ, како и Странка за демократска акција на Македонија (СДА Македонија), остри го осудија чинот на глорификација на осудениот воен злосторник. Од СДСМ оценија дека овој настап на Иван Стоилковиќ не е личен став или културна разлика, туку директна порака дека во актуелната власт има место за лица кои ги слават воените злосторници.
Опозициската партија го обвини Иван Стоилковиќ за усогласеност со поширока политичка агенда поврзана со влијанија од Србија, Русија и Кина, како и промовирање на концептот на „Српскиот свет“. Од ДУИ и СДА Македонија побараа одговорност од премиерот Христијан Мицкоски и од албанските партнери во власта, особено коалицијата Вреди, поставувајќи прашање дали и тие ја делат истата глорификација на воените злосторства.
Во врска со настанатата ситуација, премиерот Христијан Мицкоски и владејачката партија ВМРО-ДПМНЕ засега се воздржуваат од јавни коментари и молчат пред барањата на опозицијата за јасно изјаснување и политичка одговорност.
Ваквиот молк од страна на најголемата владејачка партија дополнително го засили политичкиот притисок, при што критиките се насочени кон тоа дали власта го толерира релативизирањето на најтешките злосторства извршени на европско тло по Втората светска војна. Опозициските субјекти и невладините кругови предупредуваат дека отсуството на реакција од институциите и премиерот испраќа погрешна порака за европската ориентација и мултиетничкиот карактер на државата.
