Ива Михајлова, обвинета за сообраќајна несреќа со смртни последици, се појави во Бугарија и соопшти дека македонско-бугарската граница ја преминала легално. Но, според официјалните проверки на двете држави, таа ниту излегла од Македонија ниту легално влегла во Бугарија.
Министерството за внатрешни работи соопшти дека извршило проверки во системот за гранична контрола, но дека за Михајлова нема евидентиран излез од територијата на Македонија. Проверката не завршила само во македонскиот систем.
„Преку Заедничкиот контакт-центар со Република Бугарија, извршени се проверки и од страна на бугарската гранична полиција, од каде што е добиена информација дека за наведеното лице нема евидентиран легален влез на територијата на Република Бугарија“, соопшти попладнево МВР.
Според податоците од граничните евиденции, информира министерството, последен пат Михајлова остварила влез во Бугарија во септември 2025 година, додека во октомври 2025 година е евидентиран нејзин излез од Бугарија, односно влез во Македонија.
По информацијата дека Михајлова е во Бугарија се огласи и Јавното обвинителство. Оттаму соопштија дека уште на 9 октомври 2025 година, по предлог на јавен обвинител, на обвинетата ѝ биле одземени двете патни исправи – македонскиот и бугарскиот пасош.
Покрај одземањето на пасошите, ѝ била изречена забрана за преминување на државната граница со лична карта, забрана за напуштање на Кочани и обврска редовно да се јавува кај службено лице.
Од Обвинителството велат дека надлежниот јавен обвинител ги презел сите чекори што биле во негова надлежност за обезбедување на присуството на Михајлова во постапката. Токму опасноста таа да побегне, според ОЈО, била една од клучните причини поради кои обвинителството повеќепати давало негативно мислење на нејзините барања да ѝ биде вратена патната исправа.
Со други зборови, можноста Михајлова да ја напушти државата не била непредвидена. Таа била препознаена најмалку една година претходно, поради што биле определени неколку паралелни мерки: одземање на двата пасоша, блокирање на можноста за патување со лична карта, ограничување на движењето на територијата на Кочани и редовно јавување кај службено лице.
Сепак, ниту една од нив не го спречила нејзиното заминување.
Другата страна го тврди спротивното
Наспроти податоците на македонското МВР и бугарската гранична полиција стои верзијата на Михајлова и на нејзиниот бугарски адвокат Николај Димитров.
Михајлова изјави дека границата ја преминала легално во придружба на адвокатот. Според нивното објаснување, на македонската страна ја покажала македонската лична карта, а на бугарската страна приложила бугарски документ.
Но, тоа објаснување отвора повеќе прашања отколку што дава одговори.
На Михајлова изречно ѝ било забрането да ја премине границата со лична карта. Затоа, дури и ако физички поминала низ официјален граничен премин и ако службени лица ги погледнале нејзините документи, тоа само по себе не значи дека преминувањето било законско. Без нова судска одлука со која мерката би била укината или изменета, нејзиното напуштање на државата би било спротивно на важечката забрана.
Дополнително, бугарскиот пасош, според ОЈО, бил одземен заедно со македонскиот. Оттука произлегува и прашањето каков бугарски документ покажала при наводниот влез во Бугарија и зошто таквиот влез не е регистриран во системот на бугарската гранична полиција.
Особено значајна е изјавата на адвокатот дека не сака да открие преку кој граничен премин минале за да не им создаде проблеми на луѓето што им помогнале.
Постапката против Михајлова подолго време не е само кривичен предмет. Таа стана и политичко прашање меѓу Скопје и Софија. Михајлова, која има македонско и бугарско државјанство, е обвинета за тешко дело против безбедноста во сообраќајот по несреќа на патот Кочани–Штип во која едно лице загинало, а повеќе лица биле повредени. Таа ја оспорува вината и во текот на постапката бараше да замине на лекување во Бугарија.
Основниот суд во Кочани го одби нејзиното барање за враќање на пасошите, а таквата одлука беше потврдена и од Апелацискиот суд во Штип. Судот оценил дека не било доволно докажано оти предложената медицинска процедура во Бугарија е итна и неопходна, како и дека лекување може да добие и во Македонија.
Од друга страна, бугарски политичари и институции го претставуваа случајот како прашање на правото на лекување на бугарска државјанка. Бугарски пратеници присуствуваа на судските рочишта, а предметот доби и поширока политичка димензија во односите меѓу двете држави.
Бугарското Министерство за надворешни работи соопшти дека не било однапред информирано и дека не учествувало во организацијата на нејзиното пристигнување. Тоа засега не дава основа да се тврди дека заминувањето било организирано од бугарската држава, но не ја исклучува можноста Михајлова и нејзиниот адвокат да добиле помош од поединци.
