Онлајн-нарачките од земји надвор од Европската Унија, особено од Кина, од ноември ќе поскапат поради воведувањето нова такса за обработка на малите пратки.
Новата давачка ќе почне да се применува најдоцна од 1 ноември 2026 година и ќе се однесува на мали пратки што преку електронска трговија влегуваат во ЕУ. Точниот износ на таксата сè уште треба да го утврди Европската комисија.
Оваа такса е одделна од царината од три евра која веќе се применува од 1 јули за пратки со вредност до 150 евра. Таа давачка се пресметува по категорија на стока во пратката, а не нужно само еднаш за целиот пакет. На пример, доколку во една пратка има производи од три различни категории, може да се пресметаат три давачки од по три евра.
Новата такса за обработка е дел од пошироката реформа на царинскиот систем на ЕУ. Целта е да се покријат зголемените трошоци за царински надзор и обработка на огромниот број мали пратки што пристигнуваат преку онлајн-платформи.
Мерката особено ќе ги засегне платформите што испраќаат голем број евтини производи директно до потрошувачите во Европа, како што се Temu и Shein. Иако таксата е насочена кон увозниот процес и платформите, дел од дополнителниот трошок може да биде пренесен врз крајните купувачи.
Европската Унија со промените се обидува и да создаде порамноправни услови за европските трговци, кои веќе подлежат на царински и регулаторни обврски, во однос на платформите што испорачуваат евтина стока директно од трети земји.
За купувачите од Македонија, мерката нема автоматски да значи воведување на истата давачка, бидејќи таа се однесува на влезот на пратките во царинското подрачје на ЕУ. Македонските правила за увоз и мали пратки се уредуваат со домашното царинско законодавство.
Новите европски правила се дел од поширока промена на системот за царински контроли, со која ЕУ сака подобро да го следи растечкиот број пратки од електронската трговија, да го намали ризикот од погрешно прикажана вредност на стоката и да обезбеди поголема контрола врз производите што влегуваат на европскиот пазар.
