Американскиот претседател Доналд Трамп најави можност за постигнување договор со кој би се ставил крај на војната во Украина, по средбата со рускиот претставник во Белата куќа. Разговорите се дел од дипломатските напори на Вашингтон за изнаоѓање решение за конфликтот, кој трае од февруари 2022 година.
Трамп не откри детали од разговорот со рускиот претставник Кирил Дмитриев, специјален пратеник на рускиот претседател Владимир Путин, но оцени дека постои реална можност за напредок. „Мислам дека сме многу блиску до решавање на руско-украинската војна“, изјави американскиот претседател пред новинарите во Овалната соба.
Тој најави дека евентуалниот договор нема да се однесува само на Украина, туку би можел да опфати и пошироки безбедносни прашања во Европа. Според Трамп, станува збор за „голем договор“ од кој, како што рече, сите ќе бидат задоволни.
Средбата со Дмитриев се одржала во четвртокот, 5 ноември, откако рускиот претставник учествувал на дипломатски настан во Белата куќа, организиран од првата дама Меланија Трамп. На средбата присуствувале претставници на Русија и Украина, а главна тема била хуманитарното примирје во украинскиот град Олешки, на окупираната територија во Херсонската област.
Меланија Трамп претходно посредувала во постигнувањето шестдневно локално примирје, кое овозможило доставување храна, вода и медицинска помош, како и евакуација на речиси 800 цивили од областа. Таа на состанокот порача дека привременото примирје треба да послужи како основа за постигнување потраен мир.
„Заедно можеме да создадеме нешто потрајно од привремен прекин на огнот“, изјави првата дама, додавајќи дека хуманитарните прашања треба да ги надминат поделбите предизвикани од војната.
На настанот биле присутни и рускиот претставник Кирил Дмитриев, руската комесарка за човекови права Јана Лантратова, како и украинскиот претставник Давид Арахамија и украинскиот омбудсман Дмитро Лубинец. Меланија им предала лични писма на претставниците, со барање да им ги достават на Путин и украинскиот претседател Володимир Зеленски.
Во меѓувреме, американскиот специјален пратеник Стив Виткоф најави дека на 10 и 11 ноември во Абу Даби треба да се одржи нова рунда трилатерални разговори меѓу САД, Русија и Украина. На средбите се очекува да се разговара за безбедносните гаранции за Украина, повоените безбедносни договори, деескалацијата и хуманитарните прашања.
Американскиот претставник Џаред Кушнер, кој учествувал во разговорите со украински, европски и претставници на НАТО во Брисел, соопшти дека дискусиите биле насочени кон изнаоѓање практични решенија за завршување на војната и воспоставување поширока европска безбедносна рамка.
Сепак, и покрај најавите за дипломатски напредок, клучните несогласувања меѓу Москва и Киев остануваат. Прашањата за територијалниот интегритет на Украина, безбедносните гаранции и идните односи со НАТО сè уште претставуваат сериозна пречка за постигнување конечен договор.
Трамп и претходно најавуваше дека договорот за завршување на војната е близу, но конкретно решение досега не беше постигнато. Новите разговори во Абу Даби се очекува да покажат дали последните дипломатски контакти ќе донесат поместување во преговорите.
