Повеќе од една година откако беше недостапен за македонските органи на прогонот, поранешниот директор на Државна лотарија, Перпарим Бајрами, утрово се предаде на граничниот премин „Блаце“.
Против него веќе е поднесен обвинителен акт за злоупотреба на службената положба и овластување во предметот „Државна лотарија“, а се водат и уште четири други постапки, информираше Обвинителството.
Бајрами е еден од осумтемина обвинети во случајот за работењето на Државна лотарија во периодот 2023–2024 година. Меѓу обвинетите е и поранешниот прв вицепремиер Артан Груби, а обвинението се однесува на наводни злоупотреби при воведувањето и набавката на опрема за електронски игри на среќа.
Според обвинението, со дејствијата на обвинетите на Државна лотарија ѝ била предизвикана штета од 596.125.511 денари. Обвинителството во судската постапка најави 231 материјален доказ, повеќе вештачења и седум сведоци. Сите обвинети кои досега се појавија пред судот се изјаснија дека не се чувствуваат виновни, додека Бајрами се суди во отсуство.
Против поранешниот директор се водат и други постапки поврзани со неговото раководење со Државна лотарија.
Една од нив се однесува на сомнежи за незаконско постапување при склучување договор за закуп на деловен простор. Според кривичната пријава, просторот не бил соодветно подготвен за потребите на Лотаријата, а закупнината по квадратен метар била повисока од пазарната. Во пријавата се наведува и дека на фирмата ѝ биле исплатени 24,6 милиони денари.
Уште претходно против Бајрами биле поднесувани пријави поврзани со јавни набавки и други финансиски сомнежи во работењето на Државна лотарија. Според достапните информации, против него биле поднесени повеќе кривични пријави за злоупотреби поврзани со периодот кога ја раководел државната компанија.
Падот на Перпарим Бајрами – хронологија на аферите во Државна лотарија
