Државната комисија за спречување на корупцијата (ДКСК) не отворила предмет за целосното финансирање на прославата на 35-години независност на Македонија од страна на Државна лотарија, туку појаснува дека отворениот предмет по допрен глас е само за евентуален судир на интереси на Николче Мицевски, членот од комисијата што ја одобри програмата а потоа се најде како учесник во неа, во рамките на настапот на Хозе Карерас.
Претседателот на ДКСК Адем Чучуљ во изјава за „Слободен печат“ вели дека Антикорупциска ги разгледува и останатите аспекти на прославата, но за нив нема отворено предмет.
ДКСК всушност предметот го отвора по написот на „Слободен печат“ со наслов „Ем изведувач, ем претседател на Комисијата за избор на фирма за прославата: Има ли судир на интереси Николче Мицевски?“.
Во текстот медиумот пишува дека Николче Мицевски, бил претседател на надворешната комисија која го извршила изборот на единствената пристигната понуда за прославата на независноста од компанијата „Стардаст“. Повикот траеше до петок, а три дена подоцна веќе беше објавено дека централниот изведувач кој ќе има свој настап на 8 Септември, е Дејвид Гета.
Во истражувањето на „Слободен печат“ се открива потенцијален судир на интереси кај композиторот Николче Мицевски, кој истовремено бил претседател на комисијата која ја избрала фирмата за организација на прославата за независност и директен учесник/изведувач во истата програма.
Мицевски се јавува како претседател на тричлената комисија која ја оценила и одобрила понудата на фирмата „Стардаст“ за организација на прославата. Истовремено, тој е автор на оркестрациите и аранжманите за концертот на светски познатиот тенор Хосе Карерас, кој беше дел од таа програма.
Во изјава за медиумот, Мицевски тврди дека комисијата само ја проверувала веродостојноста на документите и дека понудата за негов ангажман дошла подоцна, односно во моментот на одлучување не знаел дека ќе биде дел од програмата.
Прославата за независноста растргната помеѓу отчет и сомнежи за проневера на пари
Опозициската партија СДСМ неколку пати досега побараа итна истрага за трошењето на народните пари. Според СДСМ, јавниот повик за организација на настаните траел само пет работни дена и завршил на 8 мај, а само три дена подоцна бил најавен настапот на светски познатиот диџеј Дејвид Гета, што укажува на можност условите да биле однапред приспособени за конкретен организатор. Исто така, се бара одговорност за исплатите кон фирмата „Стардаст“ и „Авалон продукција“, како и проверка на приходите од продадените билети во износ од приближно 1,75 милиони денари и платениот данок.
Од владејачката партија ВМРО-ДПМНЕ овие обвинувања ги отфрлија како политички интриги, нагласувајќи дека компанијата ќе продължи да ги поддржува македонските културни работници.
