Владата ги претставува планираните задолжувања за 2027 година како потреба за враќање на долгови од претходниот период, но структурата на обврските покажува дека не станува збор само за наследени долгови, оцени пратеникот на СДСМ, Фатмир Битиќи, на комисиската расправа за Предлог-буџетот за следната година.
Тој посочи дека од вкупно планираните 125 милијарди денари за отплата на долгови, околу 500 милиони евра се однесуваат на еврообврзницата издадена во 2023 година. Останатиот дел од обврските, според неговото образложение, опфаќа државни хартии од вредност со пократок рок на доспевање, како и кредити од меѓународни финансиски институции.
Битиќи оцени дека не е точно целокупната сума да се претставува како враќање долгови наследени од претходната власт, бидејќи во неа се вклучени и задолжувања направени во последните две години.
„Во 2027 година имате една еврообврзница за враќање од 500 милиони евра. Тоа е 48 проценти од сумата што треба да ја вратите. Но, од 500 милиони до две милијарди е многу далеку“, рече Битиќи, повикувајќи се на податоците во Предлог-буџетот.
Тој објасни дека меѓу обврските што доспеваат се и државните хартии од вредност со рок на враќање од две и три години, издадени во претходниот период. Според него, важно е да се направи разлика меѓу отплатата на постојните обврски и новото задолжување што Владата го планира за следната година.
Битиќи посочи дека покрај отплатата на долговите, Владата планира да се задолжи за околу две милијарди евра, а предупреди и на трошоците за камати што ги носат кредитите.
„За долг од 46,5 милијарди денари, враќате камата од 12 милијарди денари. За внатрешен долг од 18 милијарди, враќате 12 милијарди камати. За која каматна стапка зборувате?“, праша пратеникот на СДСМ.
Со ова, Битиќи ја отвори темата за структурата на јавниот долг, цената на задолжувањето и начинот на кој Владата ги образложува потребите за нови кредити во рамките на Буџетот за 2027 година.









