Премиерот Христијан Мицкоски на централната свеченост по повод 35 години независност упати порака за обединување, но истовремено остро ја критикуваше опозицијата и говореше за евроинтеграциите и за прашањата поврзани со македонскиот идентитет.
„За сите има место и почит под ова небо и знаме. И не постои ваша или наша татковина, ваш и наш премиер, ваша и наша влада, ваша и наша историја. Има само една татковина, еден сон, една борба, една идеја. Само една и единствена Македонија. И премалку сме да се делиме“, порача Мицкоски.
Во говорот тој нагласи дека политичките разлики не треба да бидат пречка кога станува збор за државните интереси.
„Нема да барам од оние кои не се согласуваат со мене да почнат да мислат како мене. Но кога станува збор за државата, ќе барам од сите нас да најдеме сила да застанеме еден до друг“, рече премиерот.
Мицкоски порача дека во следните 35 години државата треба да има поголеми амбиции од самото преживување.
„Нашата национална амбиција во следните триесет и пет години не смее да биде само да опстоиме. Мора да успееме“, истакна тој.
Според него, потребно е земјата да создава знаење, да гради институции кои нема да зависат од волјата на поединци и да ги задржи младите во државата.
„Народот што со векови научил како да преживува сега мора да научи како да победува во мир“, порача Мицкоски, додавајќи дека Македонија треба „од мала држава да создаде место со големи можности“.
Во делот од говорот посветен на опозицијата, премиерот повторно употреби остар речник.
„Ако државата го наградува талогот, тогаш талогот неизбежно ќе стане елита. А држава во која талогот станува елита е држава од која вистинската елита си заминува. Токму тоа мора да го смениме“, рече Мицкоски.
Тој се осврна и на европската перспектива на земјата, нагласувајќи дека членството во Европската Унија останува стратешка цел.
„Посакувам и работам да сме генерацијата која ќе ја внесе државата во Европската Унија. Нема подобра алтернатива за државата“, порача премиерот.
Сепак, според Мицкоски, пред продолжувањето на европскиот пат потребно е да се воспостави доверба.
„Пред нас има уште еден последен предизвик, не за да го завршиме патот, туку за да го почнеме. Но за тоа најпрво треба да создадеме доверба“, рече тој.
Во тој контекст, Мицкоски ги посочи и прашањата за кои, како што нагласи, не прифаќа компромиси.
„Има прашања за кои нема компромиси и договори под маса. Нема играње со она што значи нашиот идентитет, нашето постоење, нашиот јазик и култура“, истакна тој.
„Компромисот за овие прашања значи рушење на македонскиот АСНОМ и Илинден“, додаде премиерот.
Мицкоски порача дека довербата и дијалогот мора да се градат врз факти, посочувајќи ги, меѓу другото, пресудите на Европскиот суд за човекови права во Стразбур во однос на македонската заедница во Бугарија, прашањето за употребата на македонскиот јазик и историските факти поврзани со македонскиот народ.
„Додека не ги прифатиме овие факти нема доверба, а кога нема доверба нема дијалог. Затоа, најпрвин да создадеме доверба, а потоа да водиме дијалог. Дијалог без доверба не води никаде, туку кон нови проблеми и нови порази“, порача Мицкоски.
На крајот од пораката тој повика на градење држава во која различностите нема да бидат причина за поделби, туку основа за заедничка иднина.
„Држава на сите луѓе не треба да биде само политички концепт. Треба да биде наш општествен договор“, рече Мицкоски, со порака дека земјата треба да им остави на идните генерации „не стари омрази, туку нови можности“.
