Од денеска, 1 ноември, Европската Унија воведува нов надомест за обработка од две евра за секој производ во меѓународните пратки. Оваа такса се надоврзува на царинската давачка од три евра, воведена во јули. Мерката е насочена кон кинеските продажни платформи, меѓу кои Тему, Шеин и АлиЕкспрес, а нејзината цел е покривање на трошоците за царински проверки.
За граѓаните на Европската Унија, нарачувањето производи од кинеските онлајн платформи од 1 ноември станува поскапо. Новиот надомест за царинска обработка изнесува две евра и се пресметува дополнително на постојната царинска давачка од три евра, која од 1 јули се применува на пратки со вредност под 150 евра што пристигнуваат од земји надвор од Унијата.
Така, за производ со цена од 10 евра, купувачот, покрај основниот износ, треба да плати три евра фиксна царина, уште две евра за обработка и ДДВ, доколку тој претходно не е вклучен во цената. Конечната сума дополнително расте кога во еден пакет има повеќе различни производи, бидејќи царината и надоместоците се утврдуваат одделно за секој вид стока. Ако една нарачка содржи маица, паричник, слушалки и шише вода, фиксната царина достигнува 12 евра, односно по три евра за секој артикл. Дополнително се наплаќаат по две евра за обработка на секој од нив, или вкупно осум евра. Тоа значи дека за овие четири различни производи кон државата се плаќаат вкупно 20 евра давачки, независно од нивната продажна цена.
Намена и опфат на новите давачки
Новиот надомест за обработка од две евра се наплаќа независно од вредноста на пратката. Неговата намена е да ги покрие издатоците за царински контроли и да одговори на забрзаниот раст на увозот на евтини производи, главно преку кинеските платформи за електронска трговија, како Тему, Шеин и АлиЕкспрес. Царинската давачка од три евра, која почна да се применува во јули, има привремен карактер. Предвидено е таа да остане во сила до 2028 година, кога се очекува воспоставување нов информациски систем на Европската Унија за спроведување на царинските постапки.
Додека царинската давачка се однесува конкретно на малите пратки, новиот надомест од две евра ги опфаќа сите пратки што пристигнуваат на пазарот на Унијата, без разлика на нивната вредност. Според објаснувањето на претставник на ЕУ, царинската давачка треба да воспостави рамноправни услови и да обезбеди за секоја увезена стока да се плати соодветен и оправдан царински износ. Надоместот за обработка, пак, служи за финансирање на проверките, бидејќи обемот на електронската трговија им наметнува несразмерно големо оптоварување на царинските служби.
Критики кон европскиот економски модел
Според извештаите, учеството на Европа во глобалните технолошки истражувања и развој се намалило од 23 проценти во 2005 година на само осум проценти денес. Во истиот период, уделот на САД пораснал на 62 проценти, додека Кина напредувала од речиси нула на 15 проценти. Јужна Кореја денес во истражување и развој ги надминува Германија, Франција, Велика Британија и Италија земени заедно. Германскиот канцелар Фридрих Мерц оцени дека Европа станала светски првак во прекумерното регулирање, опишувајќи ја како блок оптоварен со бирократски процедури и правила што ја задушуваат слободата на претприемачите.
