Европската Унија ја отвора вратата за нов модел на соработка со Канада, која би можела да стане првата „придружна членка“ на Унијата. Предлогот го објави претседателката на Европската комисија Урсула фон дер Лајен во нејзиното годишно обраќање за состојбата на Унијата пред Европскиот парламент во Стразбур.
Станува збор за модел кој досега не постоел во договорите на ЕУ и кој би бил различен од полноправното членство. Канадскиот премиер Марк Карни претходно побара создавање „единствен сојуз“ со ЕУ, но јасно стави до знаење дека Канада не бара целосно членство во Унијата.
Фон дер Лајен порача дека Брисел и Отава имаат слични стратешки интереси и вредности, особено во однос на демократијата, безбедноста, Украина, критичните суровини и синџирите на снабдување. Таа најави дека соработката би можела да се прошири и на вештачката интелигенција, напредното производство, енергетиката, одбранбената индустрија и развојот на Арктикот.
„Би сакала да работиме со вас за да ја отвориме вратата Канада да биде првата придружна членка на ЕУ“, порача фон дер Лајен, нагласувајќи дека ваквото партнерство не е насочено против друга земја.
Предлогот доаѓа во период на заладени односи меѓу Канада и САД. По неуспешните трговски преговори меѓу Вашингтон и Отава, двете земји воведоа меѓусебни царински мерки, што го поттикна Карни да бара поголема економска и стратешка диверзификација кон Европа.
Покрај новиот модел за партнерство со Канада, фон дер Лајен најави и создавање Европски совет за безбедност, во кој би можеле да учествуваат и партнери надвор од ЕУ, меѓу кои Канада, Велика Британија, Норвешка и Украина. Идејата е да се зајакне координацијата при безбедносни кризи и закани што не достигнуваат праг на отворена вооружена агресија.
Фон дер Лајен истовремено предложи ЕУ да воспостави сопствен механизам за одговор на хибридни закани, сличен на членот 4 од договорот на НАТО. Тој би овозможил, по барање на една членка која се чувствува загрозена, земјите од Унијата итно да се состанат и да координираат заеднички одговор.
